Зэмзэ ке, мон шер гинэ мае ке выльзэ учкыны пуксисько. Но пурысь южтолэзь нуналэ тае шедьтыкум кызьы ке учкытэк ӧй луы. Ма, чик уг куректӥськы. Нош али пичияк мылкыдме вераме потэ. Мадьгожзэ дурыстэм сӧрытэк утчало.
«Haikyū!!» (ハイキュー！！, ӟучен «Волейбол!!») со Furudate Haruichi:лэн [1] (古舘春一) 2012 арысен потылэм со нимъем ик мангаезъя Production I.G. студӥын 2014 арын лэсьтэм сёнэн аниме. Анимеез лэсьтонэн кивалтӥсьын Mitsunaka Susumu (満仲 勧) но Satō Masako (佐藤 雅子) ужаллям.
Тэмаосыз
Нимызъя валамон, со бадӟымъёзо школаысь волейбол огин сярысь аниме. Ачиз Furudate, пе, дышетскем дыръяз волейболэн выре вылэм но, ас яратонзэ егитъёслы вӧлдыны тыршем. Ма, бен, мынэсьтэм урод дышетскись луэмме возьматэ-а со, мар-о, но сизьым ар ӵоже физкультурлы дышетскытозям нырысьсэ, мар со, волейболэн шудон шуыса, — тае учкем берам гинэ валай кадь.
Озьы ке но, одӥг волейболэн гинэ со уг быры (нош соиз сярысенгес улӥын). Котькуд муртлэсь сюлэмшугъяськонъёссэ адӟеммы луэ: я анай-атайлэсь одно ик умоен лыдъямзэс возьман, я тонэн ӵош шудоно адямиос юртонтэмлэсь кышкан, я номырин висъяськисьтэм луэмысь кепыран, я ваньмыз адӟыса ӵогӟыны курдан, ассэ вылэ вань янгышез кыскон (ма, али верамелэсь но трос). Кытӥяз ачим ик сыӵе шуыса малпасько вал. Котькуд муртлэсь тае пырпотэмзэ, вормемзэ учкиськомы.
Зэмос шудӥсьёс, куд-огез суредэз туж зэмостэм потылэ, шуо ке но, луд вылын сылӥсь адямилэн мылкыдыз пыр-поч возьматэмын. Луд вылын огнад уд сылӥськы, тон сяна тыныд юрттоно вить мурт котьку вань на. Но ваньзэ радъяно вие, ваньмыз ик утись луыны турско.
Со сяна, волейболысь кыӵе ке амалъёсты но каронъёсты, син азе возьматымон, рос-прос валэктӥсько. (Волейболэз валасьтэм муртъёсты мадьгоже юнме уг пырто, ява.)
Мадьгожез но сӥмволизмез
Мадьгожезъя, Karasuno бадӟымъёзо школае[2] (烏野高校) Hinata Shōyō (日向 翔陽) но Kageyama Tobio (影山 飛雄) нимо выль нырысетӥ аръёс лыкто. Куке но пиштэм, но али «луткам куака» сяна шуымтэ Karasuno:ысь пиослэн волейбол огинзылы со кык адями бадӟым базмон луо — бератаз быдэс Нипоншаерысь ӵошатсконэ нош ик пыриськыны, «куака нош ик Токиое лобе» шуыны базмон… Ма, соберезэ ум вера, тодэмды потэ ке — учкыны ӧтисько!
Маиз мыным тунсыко потэм: Karasuno:лэн нырысетӥ канӟиез[3] 烏 karasu ‘куака’ луэ (соин ик «луткам куакаез»). Дӥськутсы сыӵе сӥгнатур луись сьӧд буёло но, ваньзы огдыре омырскыса «сӥнкроатаксы» сьӧд куакаослэн уллёен омырскемзылы потэ, пе.
Тылобурдоосты верано ке, Karasuno:лы ваче пумит потоно Shiratorizawa акадэмилэн (白鳥沢学園) пусыз тӧдьы ӧрӟи луэ (白 shira ‘тӧдьы’ но 鳥 tori ‘тылобурдо’; озьы ке но, 白鳥 ‘юсь’ шуон луэ). Вылаз на, Токиоысь Nekoma бадӟымъёзо школа (音駒高校) коӵышъёсын герӟаськемын (коӵыш шуон канӟиез ӧвӧл ке но, нипон ネコ neko ‘коӵыш’ кылэз умой кылӥське).
Нипоншаер контэкст
Нипоншаерын будымтэ адямилы кытӥыз валантэмгес луоз, лэся.
Кылсярысь, малы пичи гинэ тушо ӝужыт лякыток Azumane Asahi:ез (東峰 旭) кышкыт кожало? (Ӝужыт, тушогес дышетскисьёс ӧвӧл-а, ма?) Тушмон огинъёсын уката ик бадӟым кышкыт «агайёс» вань дыръя. Валаме быгатэмея, Нипоншаерын адямиос тросэз лапегесь луэмен (ма, валамон) но Эдо вакытысь кабукимоно шуон йырвандӥсьёс тушо луэмен сое озьы кожало.
Яке, кӧня ке пол музон школаосысь дышетскисьёс Karasuno:ез «Torino» шуыса янгышало. Канӟиосты тодэм берам валай гинэ:
| 鳥 | tori | тылобурдо |
| 烏 | karasu | сьӧд куака |
Одӥг гож пӧртэм!
Эшшо кельшем маке
Пиосъёс сярысь анимеын ке но, нылъёссы но «ӵошкыт» уг луо, ас понназы сыло. Кылсярысь, стэреотӥп чус пукись, кепырась потоно Shimizu Kiyoko (清水 潔子), кулэ дыръя, дэмӟылӥсь пиослы пумит аслыз но, Yachi Hitoka (谷地 仁花) нимо младшоезлы но дурбасьтыны быгатэ. Shimizu:лы синмаськем мылкыдо Karasuno:ос но серекъям кадь возьматэмын. Егитъёс шуон сяменгес, Shimizu — эксэйкышно.
Туж кельшиз Hayashi Yūki:лэн (林 ゆうき) но Tachibana Asami:лэн (橘 麻美) гожтэм крезьгурзы. Крезьгурез, мугор юзыр-кезьыр луымон, кулэ мылкыдлы тупа кадь потӥз. Крезьгурез 1. вакытысен 4. вакытозь синйылтымон уг воштӥськы, ӵапак вуж лейтмотӥвъёс выль сямен чузъясько, кыӵе ке азинскемез шӧдыто. Ӧйтӧд, OST:сэ лузер-лазер кылзыса быдтыны вуиськем.
Берпум кылъёс
Али Haikyū:лэн 4 вакытэз вань, берпуметӥез 2020 аре потэм. 3. но 4. вакытъёслэн пӧртэмзы соку ик синйылтымон (урод сяменгес) луэ: секундскын суред лыд кулэсмиз но, суредманэз кызьы ке сумъямгес кадь луиз. Куд-огез мангалы тупась карыны тыршизы шуо но, мон озьы ӧйгес шуысал. Ма, корона-аре потэмез адӟиське, дыр. Озьы ке но, мадез озьы ик умой возьматэмын.
Зэмзэ ке, тӥ, оло, та аниме (яке манга) сярысь кылэмын ни, дыр. Нипоншаерын но, зарезь сьӧрын но сое туж шуныт пумиталлям. Нипоншаерын со волейболлэн огез тодметэзлы пӧрмем но, луоз. Нялтас вераса, туннэ (тае 19. гудырикошконэ лыдӟиськоды ке, ма, Нипоншаерын быриз ни, лэся) тодэ ваён нуналъёсын тӧрлыко лыдметэ пыртэм Haikyū:лэн нуналыз. «ハイキュー» кыллэн 8 hachi, 1 ichi, 9 kyū лыдпусъёсты огазе каремлы (8月19日 → 19. гудырикошкон) кельшеменыз озьы бырйиллям.
Кемалась ӧвӧл 2023 арысь гудырикошконэ «Haikyū!! Final» кык люкетлэсь фильмлэсь потэмзэ ялӥзы — 2012 арысь но 2013 ар кутсконысь учыръёслы сьӧд дугдонпус понозы.
Ма, укыр ушъяськем ни, лэся. Озьы ке но, мылкыдме но синмаськемме тӥледлы пичияк ке но вераны быгатӥ шуыса оскисько. Веран кылды вань ке — коментаръёсы ӧтисько!
Валэктонъёс
Тае кулэен лыдъясь адямиослы: та статтяын нипон нимъёс «ӵукпалрад» шуонэн гожтэмын: озьы нырысь выжыним, бӧрсяз — муртним мынэ (озьы ик нырысь пумиськыку нипон пусъёсын гожтонзэ сётӥсько). Вашкала удмурт нимъёс со радэнгес ик пӧрмо, пе. ↩︎
Нипоншаерысь бадӟымъёзо школаос Росиысь 9—11. аръёслы тупало. ↩︎
Канӟиос (漢字, ӟучен «кандзи» гожто) со маке малпанэз, арбериез верась китай кылысь ваем пусъёс (иероглифъёс). ↩︎